Pars I. De Fide
Quæst. Solane fortasse an anima an vero etiam corpus simul æternis fruentur gaudiis?
Resp. Quemadmodum anima et corpus sociata opera spe æternæ mercedis bonum efficiunt: ita etiam lætitiam exsultationemque eamdem, communem, non autem separatam et divisam habebunt. Non enim alia animæ lætitia alia corporis erit; siquidem corpus gloria coruscabit; totus vero homo ex anima et corpore glorioso compositus erit. Atque tunc Angelis ipsis similis et æqualis fiet, secundum Scripturam, quæ dicit (Matt. xxii. 30): 'Nam in resurrectione nec ducunt uxores nec ducuntur, sed sunt ut Angeli Dei in cœlo.' Corpus gloriosum erit, immortale, incorruptibile, non cibi, non potus indigum, simile spiritui, dicente ita Scriptura (1 Cor. xv. 52): 'Mortui resurgent incorruptibiles, et nos immutabimur. Oportet enim corruptibile hocce induere incorruptibilitatem et mortale hocce induere immortalitatem.' Ceterum lætitia ista exsultatioque non alia erit, quam contemplatio beatissimæ Trinitatis et chorus spiritualis junctim cum Angelis agitandus, dicente Apostolo (1 Cor. xiii. 12): 'Cernimus nunc per speculum in ænigmate, tunc autem a facie ad faciem. Nunc cognosco ex parte, tunc vero cognoscam pro cognitione, qua instructus fuero.' Quamquam vero Mosi dixit Dominus (Exod. xxxiii. 20): 'Nequaquam faciem meam videre, et vivere homo potest;' sed illud intelligendum est ante summam perfectissimamque istam redemptionem et de corpore hoc corruptibili, necdum gloriæ suæ compote vitaque præsenti; sed post omnimodam istam redemptionem in corpore cœlesti gloria decorato, in futura et æterna vita, post diem extremi judicii indet nobis lucem Deus, qua lucem Dei ipsius contueri queamus, prout canit divinus vates (Psa. xxxvi. 9): 'Apud te est fons vitæ, et in luce tua videbimus lucem.' Quæ lux quoniam adspectu ipso percipietur, desiderium omne omnis sapientiæ atque pulchritudinis sedabit ac compescet. Namque in contemplatione summi boni cetera bona universa continentur, bonique illius fruitio omnis lætitiæ complementum est, secundum eumdem sacrum fidicinem (Psa. xvii. 15): 'Satiabor, quum apparuerit gloria tua.'
Scripture references printed in the source
Scripture references printed in the source: Matt.22.30; 1Cor.15.52; 1Cor.13.12; Exod.33.20; Ps.37.9; Ps.18.15