Skip to content

Westminster Confession of Faith, Latin translation of 1656 · Caput 8. De Christo Mediatore.

Text display

Font size: 19px

Go to a reference
Same place in another edition

Anchor: WCF1646.8.1

Side by side

Tap a number or a passage to select it.

Complacitum est Deo Filium ejus unigenitum Dominum Jesum in æterno suo proposito eligere atque ordinare ut Mediator esset inter Deum et hominem, Propheta, Sacerdos, et Rex, caput idem et salvator Ecclesiæ suæ; rerum omnium hæres, Mundique Judex; cui ab æterno populum dedit futurum illi in semen, ac per illum stato tempore redimendum, vocandum, justificandum, sanctificandum ac glorificandum.
Scripture references printed in the source

Scripture references printed in the source: Isa.42.1; 1Pet.1.19-1Pet.1.20; John.3.16; 2Tim.2.5; Acts.3.22; Heb.5.5-Heb.5.6; Ps.2.6; Luke.1.33; Eph.5.23; Heb.1.2; Acts.17.31; John.17.6; Ps.22.30; Isa.53.10; 1Tim.2.6; Isa.55.4-Isa.55.5; 1Cor.1.30

Filius Dei persona secunda in Trinitate, verus nempe idem æternusque Deus, substantiæ cum Patre unius ejusdemque, eique coæqualis, cum advenerat temporis plenitudo, assumpsit naturam humanam, una cum omnibus ejus proprietatibus essentialibus, communibusque infirmitatibus, immunem tamen a peccato, conceptus scilicet in utero eque substantia Mariæ Virginis, virtute Spiritus Sancti. Adeo sane ut naturæ duæ, integræ, perfectæ, distinctæque Deitas ac humanitas in una eademque persona indissolubili nexu conjunctæ fuerint, sine conversione, compositione, aut confusione. Quæ quidem persona vere Deus est ac vere homo, unus tamen Christus, unicus inter Deum et hominem Mediator.
Scripture references printed in the source

Scripture references printed in the source: John.1.1; John.1.14; 1John.5.20; Phil.2.6; Gal.4.4; Heb.2.14; Heb.2.16-Heb.2.17; Heb.4.15; Luke.1.27; Luke.1.31; Luke.1.35; Col.2.9; Rom.9.5; 1Pet.3.18; 1Tim.3.16; Rom.1.3-Rom.1.4; 1Tim.2.5

Dominus Jesus in humana sua natura divinæ hunc modum conjuncta sanctificatus est, ac Spiritu sancto supra mensuram unctus, in se habens omnes sapientiæ notitiæqum thesauros; in quo Patri visum est ut omnis plenitudo inhabitaret, atque eo quidem fine ut sanctus, innocuus, intaminatus, plenusque gratiæ ac veritatis existens, ad Mediatoris Vadisque munus exequendum perfecte esset instructus. Quod ille officium non arripuit sibi, verum a Patre erat ad id vocatus, qui omnem ei potestatem ac judicium in manus dedit, und cum mandato exercendi.
Scripture references printed in the source

Scripture references printed in the source: Ps.45.7; John.3.34; Col.2.3; Col.1.19; Heb.7.26; John.1.14; Acts.10.38; Heb.12.24; Heb.7.22; Heb.5.4-Heb.5.5; John.5.22; John.5.27; Matt.28.18; Acts.2.36

Hoc munus promtissima voluntate in se suscepit Dominus Jesus, quod ut expleret factus est sub Lege, eam perfecte implevit, immediate in anima, sua gravissimos subiit cruciatus, in corpore vero perpessiones quam maxime dolorificas; crucifixus est, ac mortuus; sepultus est, mansitque sub mortis potestate; nec tamen ullam vidit corruptionem. Tertio die surrexit a mortuis, cum eodem in quo passus fuerat corpore, cum quo etiam ascendit in cœlum, ibique sedens ad dextram Patris intercedit, rediturus inde in consummatione mundi, ad homines angelosque judicandum.
Scripture references printed in the source

Scripture references printed in the source: Ps.40.7-Ps.40.8; Heb.10.5-Heb.10.10; John.10.18; Phil.2.8; Gal.4.4; Matt.3.15; Matt.5.17; Matt.26.37-Matt.26.38; Luke.22.44; Matt.27.46; Matt.26; Matt.27; Acts.2.23-Acts.2.24; Acts.2.27; Acts.13.37; Rom.6.9; 1Cor.15.3-1Cor.15.4; John.20.25; John.20.27; Mark.16.19; Rom.8.34; Heb.9.24; Heb.7.25; Rom.14.9-Rom.14.10; Acts.1.11; Acts.10.42; Matt.13.40-Matt.13.42; Jude.1.6; 2Pet.2.4

Dominus Jesus obedientia sua perfecta, suique ipsius sacrificio; quod per æternum Spiritum Deo semel obtulit, justitiæ Patris plene satisfecit, ac omnibus ei a Patre datis non modo reconciliationem; verum etiam æternam hæreditatem in regno cœlorum acquisivit.
Scripture references printed in the source

Scripture references printed in the source: Rom.5.19; Heb.9.14; Heb.9.16; Heb.10.14; Eph.5.2; Rom.3.25-Rom.3.26; Dan.9.24; Dan.9.26; Col.1.19-Col.1.20; Eph.1.11; Eph.1.14; John.17.2; Heb.9.12; Heb.9.15

Quamvis redemptionis opus non nisi post incarnationem ejus, a Christo quidem actu effectum fuerit, vis tamen ejus, efficacia, et beneficia per omnia iam inde a mundi primordiis elapsa secula electis sunt communicata, in et per promissiones illas, typos, et sacrifica, quibus revelatum erat et significatum hunc esse semen illud mulieris, quod contriturum erat serpentis caput, agnumque illum mactatum ab initio mundi; ut qui heri ac hodie idem est et in sempiternum.
Scripture references printed in the source

Scripture references printed in the source: Gal.4.4-Gal.4.5; Gen.3.15; Rev.13.8; Heb.13.8

Christus in opere Mediatorio agit secundum utramque naturam, id agens per utramvis, quod eidem proprium est, nonnunquam tamen fit propter personæ unitatem ut quod uni naturæ proprium est, personæ ab altera natura denominatæ in Scriptura tribuatur.
Scripture references printed in the source

Scripture references printed in the source: Heb.9.14; 1Pet.3.18; Acts.20.28; John.3.13; 1John.3.16

Pro quibus Christus redemptionem acquisivit, iis omnibus certo quidem ac efficaciter eam applicat impertitque, pro eis intercedens, eisque in verbo et per verbum revelans mysterium salutis, per Spiritum suum eis ut credere velint ac obedire persuadens efficaciter, eorumque gubernans corda verbo suo spirituque; sed et vi sua omnipotenti, ac sapientia debellans omnes eorum hostes, iis autem modis mediisque quæ admirabili et inscrutabili ejus dispensationi sunt maxime consentanea.
Scripture references printed in the source

Scripture references printed in the source: John.6.37; John.6.39; John.10.15-John.10.16; 1John.2.1-1John.2.2; Rom.8.34; John.15.13; John.15.15; Eph.1.7-Eph.1.9; John.17.6; John.14.16; Heb.12.2; 2Cor.4.13; Rom.8.9; Rom.8.14; Rom.15.18-Rom.15.19; John.17.17; Ps.110.1; 1Cor.15.25-1Cor.15.26; Mal.4.2-Mal.4.3; Col.2.15

Source and terms: Westminster Confession of Faith, Latin translation of 1656 · public domain · The Westminster Confession of Faith, Latin translation (Cambridge 1656). In: Philip Schaff, The Creeds of Christendom, vol. 3 (Harper 1877; 4th ed. rev. D. S. Schaff 1919). Digital text: Christian Classics Ethereal Library ThML edition (ccel.org/ccel/schaff/creeds3, Rights: Public Domain). · terms

Bookmarks, notes and the reading position are stored only in this browser.