Skip to content

Westminster Confession of Faith, Latin translation of 1656 · Caput 5. De Providentia.

Text display

Font size: 19px

Go to a reference
Same place in another edition

Anchor: WCF1646.5.1

Side by side

Tap a number or a passage to select it.

Magnus ille rerum omnium creator Deus sapientissima sua et sanctissima simul providentia creaturas, actiones, resque a maximis usque ad minimas universas sustentat, dirigit, ordinat, gubernatque secundum infallibilem suam præscientiam, et voluntatis suæ consilium liberum ac immutabile, ad laudem gloriæ sapientiæ suæ, potentiæ, justitiæ, bonitatis, ac misericordiæ.
Scripture references printed in the source

Scripture references printed in the source: Heb.1.3; Dan.4.34-Dan.4.35; Ps.135.6; Acts.17.25-Acts.17.26; Acts.17.28; Job.38; Job.39; Job.40; Job.41; Matt.10.29-Matt.10.31; Prov.15.3; Acts.15.18; Ps.94.8-Ps.94.11; Eph.1.11; Ps.33.10-Ps.33.11; Isa.63.14; Eph.3.10; Rom.9.17; Gen.45.7; Ps.145.7

Quamvis respectu præscientiæ ac decreti Dei (causæ primæ) omnia immutabiliter atque infallibiliter eveniant, per eandem tamen ille providentiam eadem ordinat evenire necessario, libere, aut contingenter, pro natura causarum secundarum.
Scripture references printed in the source

Scripture references printed in the source: Acts.2.23; Gen.8.22; Jer.31.35; Exod.21.13; Deut.19.5; 1Kgs.22.28; 1Kgs.22.34; Isa.10.6-Isa.10.7

Deus in providentia sua ordinaria mediis utitur, iis tamen non astringitur, quo minus absque eis, supra aut etiam contra ea pro arbitrio suo operetur.
Scripture references printed in the source

Scripture references printed in the source: Acts.27.31; Acts.27.44; Isa.55.10-Isa.55.11; Hos.2.21-Hos.2.22; Hos.1.7; Matt.4.4; Job.34.10; Rom.4.19-Rom.4.21; 2Kgs.6.6; Dan.3.27

Omnipotentem Dei potentiam, sapientiam inscrutabilem, bonitatemque infinitam providentia ejus eo usque manifestat, ut vel ad primum lapsum, omniaque reliqua peccata, seu hominum sint sive angelorum, se extendat; neque id quidem permissione nuda, verum cui conjuncta est sapientissima potentissimaque eorum limitatio, ac aliusmodi ad sanctos sibi propositos fines dispensatione multiplici ordinatio et gubernatio; ita tamen ut omnis eorum vitiositas a sola proveniat creatura, a Deo neutiquam, qui sanctissimus quum sit justissimusque neque est, nec esse quidem potest peccati autor aut approbator.
Scripture references printed in the source

Scripture references printed in the source: Rom.11.32-Rom.11.34; 2Sam.24.1; 1Chr.21.1; 1Kgs.22.22-1Kgs.22.23; 1Chr.10.4; 1Chr.10.13-1Chr.10.14; 2Sam.16.10; Acts.2.23; Acts.4.27-Acts.4.28; Acts.14.16; Ps.76.10; 2Kgs.19.28; Gen.50.20; Isa.10.6-Isa.10.7; Isa.10.12; Jas.1.13-Jas.1.14; Jas.1.17; 1John.2.16; Ps.50.21

Sapientissimus, justissimus, et gratiosissimus idem Deus, sæpenumero filios suos tentationibus multifariis, suorumque cordium corruptioni ad tempus permittit; quo ob admissa prius peccata castiget eos, vel corruptionis iis detegat vim occultam, cordiumque suorum fraudulentiam ut humilientur; quoque eos excitet ad strictam magis et constantem a seipso proferendis suppetiis dependentiam; Quo denique adversus onmes occasiones peccati de futuro reddat cautiores. Sed et ob alios etiam varios fines, justos sanctosque sibi propositos.
Scripture references printed in the source

Scripture references printed in the source: 2Chr.32.25-2Chr.32.26; 2Chr.32.31; 2Sam.24.1; 2Cor.12.7-2Cor.12.9; Ps.73; Ps.77.1-Ps.77.10; Ps.77.12; Mark.14.66-Mark.14.72; John.21.15-John.21.17

Quod scelestos illos spectat impiosque homines, quos Deus, ut justus judex, ob peccata præcedentia excæcat induratque; eis ille non solum gratiam suam non impertit, qua ipsis cum illuminari intellectus, tum affici corda potuissent; sed interdum subtrahit eis quibus imbuti erant dona, et ipsos exponit illiusmodi objectis, unde corruptio eorum arripit sibi peccandi occasiones; simulque tradit eos suis ipsorum concupiscentiis et tentationibus mundi, et potestati Satanæ; ex quo fit ut seipsos ipsi indurent, et quidem sub iisdem mediis quibus utitur Deus ad alios emolliendos.
Scripture references printed in the source

Scripture references printed in the source: Rom.1.24; Rom.1.26; Rom.1.28; Rom.11.7-Rom.11.8; Deut.29.4; Matt.13.12; Matt.25.29; Deut.2.30; 2Kgs.8.12-2Kgs.8.13; Ps.81.11-Ps.81.12; 2Thess.2.10-2Thess.2.12; Exod.7.3; Exod.8.15; Exod.8.32; 2Cor.2.15-2Cor.2.16; Isa.8.14; 1Pet.2.7-1Pet.2.8; Isa.6.9-Isa.6.10; Acts.28.26-Acts.28.27

Providentia Dei sicut ad omnes creaturas universali modo se extendit; ita modo plane peculiari Ecclesiæ suæ curam gerit, ac in ejus bonum disponit universa.
Scripture references printed in the source

Scripture references printed in the source: 1Tim.4.10; Amos.9.8-Amos.9.9; Rom.8.28; Isa.43.3-Isa.43.5; Isa.43.14

Source and terms: Westminster Confession of Faith, Latin translation of 1656 · public domain · The Westminster Confession of Faith, Latin translation (Cambridge 1656). In: Philip Schaff, The Creeds of Christendom, vol. 3 (Harper 1877; 4th ed. rev. D. S. Schaff 1919). Digital text: Christian Classics Ethereal Library ThML edition (ccel.org/ccel/schaff/creeds3, Rights: Public Domain). · terms

Bookmarks, notes and the reading position are stored only in this browser.