Skip to content

Westminster Confession of Faith, Latin translation of 1656 · Caput 1. De Scriptura Sacrosancta.

Text display

Font size: 19px

Go to a reference
Same place in another edition

Anchor: WCF1646.1.1

Side by side

Tap a number or a passage to select it.

Quanquam naturæ lumen, operaque Dei cum Creationis tum Providentiæ, bonitatem ejus, sapientiam, potentiamque eo usque manifestant, ut homines vel inde reddantur inexcusabiles: eam tamen Dei, voluntatisque divinæ cognitionem, quæ porro est ad salutem necessaria, nequeunt nobis ingenerare. Quocirca Domino complacitum est, variis quidem modis vicibusque Ecclesiæ suæ semetipsum revelare, suamque hanc voluntatem patefacere; sed et eandem omnem postea literis consignare, quo et veritati suæ tam conservandæ quam propagandæ melius consuleret, nec Ecclesia sua contra carnis corruptelam, contra malitiam mundi Satanæque, præsidio foret ac solatio destituta. Unde factum est, ut, postquam pristini illi modi, quibus olim populo suo Deus voluntatem suam revelabat, jam desiverint, Scriptura Sacra sit maxime necessaria.
Scripture references printed in the source

Scripture references printed in the source: Rom.2.14-Rom.2.15; Rom.1.19-Rom.1.20; Ps.19.1-Ps.19.3; Rom.1.32; Rom.2.1; 1Cor.1.21; 1Cor.2.13-1Cor.2.14; Heb.1.1; Prov.22.19-Prov.22.21; Luke.1.3-Luke.1.4; Rom.15.4; Matt.4.4; Matt.4.7; Matt.4.10; Isa.8.19-Isa.8.20; 2Tim.3.15; 2Pet.1.19; Heb.1.1-Heb.1.2

Sacræ Scripturæ, nomine, seu Verbi Dei scripti continentur hodie omnes illi libri tam Veteris quam Novi Instrumenti, nempe quorum inferius subsequuntur nomina. Veteris Testamenti. Genesis, Exodus, Leviticus, Numeri, Deuteronomium, Josua, Judices, Ruth, Samuelis 1, Samuelis 2, Regum 1, Regum 2, Chronicorum 1, Chronicorum 2, Ezra, Nehemias, Esther, Job, Psalmi, Proverbia, Ecclesiastes, Canticum Canticorum, Isaias, Jeremias, Lamentationes, Ezechiel, Daniel, Hosea, Joel, Amos, Obadias, Jonas, Micheas, Nahum, Habucuc, Zephanias, Haggæus, Zacharias, Malachias. Novi autem. Evangelium secundem Matthæum, Marcum, Lucam, Johannem. Acta apostolorum, Pauli espistolæ ad Romanos, Corinthios I. II, Galatas, Ephesios, Philippenses, Collossenses, Thessalonicens I. II, Timotheum I. II, Titum, Philemonem, Epist. ad Hebræos, Jacobi Epistola, Petri Epist. I. II, Johan. Epist. I. II, III, Judæ Epistola, Apocalypsis. Qui omnes divina inspiratione dati sunt in Fidei vitæque regulam.
Notes in the source · 1
  • [So the Cambridge eds. of 1656 and 1659. The Edinb. ed. reads Testamenti.]

Scripture references printed in the source: Luke.16.29; Luke.16.31; Eph.2.20; Rev.22.18-Rev.22.19; 2Tim.3.16

Libri Apocryphi, vulgo dicti, quum non fuerint divinitus inspirati, Canonem Scripturæ nullatenus constituunt; proindeque nullam aliam authoritatem obtinere debent in Ecclesia Dei, nec aliter quam alia humana scripta, sunt aut approbandi aut adhibendi.
Scripture references printed in the source

Scripture references printed in the source: Luke.24.27; Luke.24.44; Rom.3.2; 2Pet.1.21

Authoritas Scripturæ sacræ propter quam ei debetur fides et observantia, non ab ullius aut hominis aut Ecclesiæ pendet testimonio, sed a solo ejus authore Deo, qui est ipsa veritas: eoque est a nobis recipienda, quoniam est Verbum Dei.
Scripture references printed in the source

Scripture references printed in the source: 2Pet.1.19; 2Pet.1.21; 2Tim.3.16; 1John.5.9; 1Thess.2.13

Testimonium Ecclesiæ efficere quidem potest ut de Scriptura sacra quam honorifice sentiamus; materies insuper ejus cœlestis, doctrinæ vis et efficacia, styli majestas, partium omnium consensus, totiusque scopus (ut Deo nempe omnis gloria tribuatur), plena denique quam exhibet unicæ ad salutem viæ commonstratio, præter alias ejus virtutes incomparabiles, et perfectionem summam, argumenta sunt quibus abunde se Verbum Dei et luculenter probat; nihilominus tamen plena persuasio et certitudo de ejus tam infallibili veritate, quam authoritate divina non aliunde nascitur quam ab interna operatione Spiritus Sancti, per verbum et cum verbo ipso in cordibus nostris testificantis.
Scripture references printed in the source

Scripture references printed in the source: 1Tim.3.15; 1John.2.20; 1John.2.27; John.16.13-John.16.14; 1Cor.2.10-1Cor.2.12; Isa.59.21

Consilium Dei universum de omnibus quæ ad suam ipsius gloriam, quæque ad hominum salutem, fidem, vitamque sunt necessaria, aut expresse in Scriptura continetur, aut consequentia bona et necessaria derivari potest a Scriptura; cui nihil deinceps addendum est, seu novis a spiritu revelationibus, sive traditionibus hominum. Internam nihilominus illuminationem Spiritus Dei ad salutarem eorum perceptionem, quæ in Verbo Dei revelantur, agnoscimus esse necessariam: quin etiam nonnullas esse circumstantias cultum Dei spectantes et Ecclesiæ regimen, iis cum humanis actionibus et societatibus communes, quæ naturali lumine ac prudentia Christiana secundum generales verbi regulas (perpetuo quidem illas observandas) sunt regulandæ.
Scripture references printed in the source

Scripture references printed in the source: 2Tim.3.15-2Tim.3.17; Gal.1.8-Gal.1.9; 2Thess.2.2; John.6.45; 1Cor.2.9-1Cor.2.10; 1Cor.2.12; 1Cor.11.13-1Cor.11.14; 1Cor.14.26; 1Cor.14.40

Quæ in Scriptura continentur non sunt omnia æque aut in se perspicua, aut omnibus hominibus evidentia, ea tamen omnia quæ ad salutem necessaria sunt cognitu, creditu, observatu, adeo perspicue, alicubi saltem in Scriptura, proponuntur et explicantur, ut eorum non docti solum, verum indocti etiam ordinariorum debito usu mediorum, sufficientem assequi possint intelligentiam.
Scripture references printed in the source

Scripture references printed in the source: 2Pet.3.16; Ps.119.105; Ps.119.130

Instrumentum Vetus Hebræa lingua (antiqua Dei populo nempe vernacula) Novum autem Græca (ut quæ apud Gentes maxime omnium tunc temporis, quum scriberetur illud, obtinuerat), immediate a Deo inspirata, ejusque cura et Providentia singulari per omnia huc usque secula pura et intaminata custodita, ea propter sunt authentica. Adeo sane ut ad illa ultimo in omnibus de religione controversiis Ecclesia debeat appellare. Quoniam autem Originales istæ linguæ non sunt toti Dei populo intellectæ (Quorum tamen et jus est ut scripturas habeant, et interest plurimum, quique eas in timore Dei legere jubentur et perscrutari) proinde sunt in vulgarem cujusque Gentis, ad quam pervenerint linguam transferendæ, ut omnes, verbo Dei opulenter in ipsis habitante, Deum grato acceptoque modo colant, et per patientiam ac consolationem Scripturarum spem habeant.
Scripture references printed in the source

Scripture references printed in the source: Matt.5.18; Isa.8.20; Acts.15.15; John.5.39; John.5.46; 1Cor.14.6; 1Cor.14.9; 1Cor.14.11-1Cor.14.12; 1Cor.14.24; 1Cor.14.27-1Cor.14.28; Col.3.16; Rom.15.4

Infallibilis Scripturam interpretandi regula est Scriptura ipsa. Quoties igitur cunque oritur quæstio de. vero plenoque Scripturæ cujusvis sensu (unicus ille est non multiplex), ex aliis locis, qui apertius loquuntur, est indagandus et cognoscendus.
Scripture references printed in the source

Scripture references printed in the source: 2Pet.1.20-2Pet.1.21; Acts.15.15

Supremus judex, a quo omnes de religione controversiæ sunt determinandæ, omnia Conciliorum decreta, opiniones Scriptorum Veterum, doctrinæ denique hominum, et privati quicunque Spiritus sunt examinandi, cujusque sententia tenemur nemur acquiescere, nullus alius esse potest, præter Spiritum Sanctum in Scriptura pronunciantem.
Scripture references printed in the source

Scripture references printed in the source: Matt.22.29; Matt.22.31; Eph.2.20; Acts.28.25

Source and terms: Westminster Confession of Faith, Latin translation of 1656 · public domain · The Westminster Confession of Faith, Latin translation (Cambridge 1656). In: Philip Schaff, The Creeds of Christendom, vol. 3 (Harper 1877; 4th ed. rev. D. S. Schaff 1919). Digital text: Christian Classics Ethereal Library ThML edition (ccel.org/ccel/schaff/creeds3, Rights: Public Domain). · terms

Bookmarks, notes and the reading position are stored only in this browser.