Перейти к содержанию

Bava Batra · 46b

Вид текста

Размер шрифта: 19px

Перейти к месту
То же место в другом издании

Опорное место: BT.BavaBatra.46b.1

Нажмите на номер или текст фрагмента, чтобы выбрать его.

Nezikin

ראה תניא
אמר רב אשי ואי חכים משוי ליה ראה דאמר ליה אמאי תפיסת ליה לאו משום דאית לך גבאי השתא אפקינהו ושימינהו שקול את דידך ואשקול אנא דידי א"ל רב אחא בריה דרב אויא לרב אשי מצי א"ל לא צריכנא לשומא דידך כבר שמוה קמאי דקמך:
אריס אין לו חזקה: אמאי עד האידנא פלגא והשתא כולה א"ר יוחנן באריסי בתי אבות
אמר רב נחמן אריס שהוריד אריסין תחתיו יש לו חזקה מאי טעמא דלא עביד אינש דנחתי אריסי לארעיה ושתיק
א"ר יוחנן אריס שחלק לאריסין אין לו חזקה מאי טעמא אימור הרמניא בעלמא שויוה
שלח ליה ר"נ בר רב חסדא לר"נ בר יעקב ילמדנו רבינו אריס מעיד או אינו מעיד הוה יתיב רב יוסף קמיה אמר ליה הכי אמר שמואל אריס מעיד והתניא אינו מעיד
לא קשיא הא דאיכא פירא בארעא והא דליכא פירא בארעא
(עמלק סימן)
תנו רבנן ערב מעיד ללוה והוא דאית ליה ארעא אחריתי מלוה מעיד ללוה והוא דאית ליה ארעא אחריתי
לוקח ראשון מעיד ללוקח שני והוא דאית ליה ארעא אחריתי

Источник и условия: Вавилонский Талмуд (37 трактатов), текст виленского издания (he.wikisource) · CC BY-SA 4.0 · Talmud Bavli, Vilna edition, text from Hebrew Wikisource (he.wikisource.org, תלמוד בבלי), via Sefaria-Export (licence field 'CC-BY-SA'). · условия · источник

Закладки, заметки и место чтения хранятся только в этом браузере.