Skip to content

Bava Batra · 136b

Text display

Font size: 19px

Go to a reference
Same place in another edition

Anchor: BT.BavaBatra.136b.1

Tap a number or a passage to select it.

Nezikin

אמר רבי יוחנן לא קנה לוקח וריש לקיש אמר קנה לוקח
רבי יוחנן אמר לא קנה לוקח קנין פירות כקנין הגוף דמי
וריש לקיש אמר קנה לוקח קנין פירות לאו כקנין הגוף דמי
והא איפליגו בה חדא זימנא דאיתמר המוכר שדהו לפירות רבי יוחנן אמר מביא וקורא וריש לקיש אמר מביא ואינו קורא
רבי יוחנן אמר מביא וקורא קסבר קנין פירות כקנין הגוף דמי וריש לקיש אמר מביא ואינו קורא קנין פירות לאו כקנין הגוף דמי
אמר לך ר' יוחנן אף על גב דבעלמא קנין פירות כקנין הגוף דמי הכא אצטריך סלקא דעתך אמינא אבא לגבי בריה אחולי אחיל קא משמע לן
ורבי שמעון בן לקיש אמר אף על גב דבעלמא קנין פירות לאו כקנין הגוף דמי הכא אצטריך סלקא דעתך אמינא כל לגבי נפשיה אפילו במקום בריה נפשיה עדיפא ליה קא משמע לן
איתיביה רבי יוחנן לריש לקיש נכסי לך ואחריך יירש פלוני ואחריו יירש פלוני מת ראשון קנה שני מת שני קנה שלישי
מת שני בחיי ראשון יחזרו נכסים ליורשי ראשון
ואם איתא ליורשי נותן מיבעי ליה
אמר ליה כבר תרגמה רב הושעיא בבבל אחריך שאני וכן רמי רבה בר רב הונא קמיה דרב ואמר אחריך שאני
והתניא יחזרו ליורשי נותן

Source and terms: Babylonian Talmud (37 tractates), text of the Vilna edition (Hebrew Wikisource) · CC BY-SA 4.0 · Talmud Bavli, Vilna edition, text from Hebrew Wikisource (he.wikisource.org, תלמוד בבלי), via Sefaria-Export (licence field 'CC-BY-SA'). · terms · source

Bookmarks, notes and the reading position are stored only in this browser.