Tap a number or a passage to select it.
8:1 ܘܕܛܠܐ ܡܢ ܗܠܝܢ ܐܝܬܘܗܝ ܟܕ ܡܡܠܟ ܗܘܐ ܐܪܛܚܫܫܬ ܡܠܟܐ ܕܦܪ̈ܣܝܐ ܥܠ ܗܘܐ ܥܙܪܐ ܕܒܝܬ ܫܐܪܝܐ ܗܘ ܕܥܙܪܝܐ ܗܘ ܕܚܠܩܝܐ ܗܘ ܕܫܠܘܡ
8:2 ܗܘ ܕܨܕܘ ܗܘ ܕܐܚܝܛܘܒ ܗܘ ܕܐܡܐܪܝܐ ܗܘ ܕܥܘܙܝܐ ܗܘ ܕܡܪܪܘܬ ܗܘ ܕܙܪܚ ܗܘ ܕܫܘܝܐ ܗܘ ܕܒܘܩܐ ܗܘ ܕܐܒܝܫܘܝ ܗܘ ܕܦܝܢܚܣ ܗܘ ܕܐܠܝܥܙܪ ܗܘ ܕܐܗܪܘܢ ܟܗܢܐ ܩܕܡܝܐ
8:3 ܗܢܐ ܥܙܪܐ ܣܠܩ ܡܢ ܒܒܝܠ ܐܟܡܢ ܕܣܦܪܐ ܡܗܝܪܐ ܐܝܬܘܗܝ ܗܘܐ ܒܢܡܘܣܗ ܕܡܘܫܐ ܗܘ ܕܐܬܝܗܒ ܡܢ ܐܠܗܐ ܕܐܝܣܪܝܠ
8:4 ܘܝܗܒ ܠܗ ܡܠܟܐ ܬܫܒܘܚܬܐ ܟܕ ܐܫܟܚ ܛܝܒܘܬܐ ܩܕܡܘܗܝ ܥܠ ܟܠܗܝܢ ܦܝܣ̈ܬܐ ܕܝܠܗ
8:5 ܘܣܠܩܘ ܥܡܗ ܡܢ ܒܢܝ̈ܐ ܕܐܝܣܪܝܠ ܘܡܢ ܟܗ̈ܢܐ ܘܠܘ̈ܝܐ ܘܡܙܡܪ̈ܢܐ ܕܟܗ̈ܢܝܬܐ ܘܬܪ̈ܥܐ ܘܥܒ̈ܕܝ ܟܗ̈ܢܐ ܠܐܘܪܝܫܠܡ
8:6 ܒܫܢܬܐ ܫܒܝܥܝܬܐ. ܟܕ ܐܡܠܟ ܗܘܐ ܐܪܛܚܫܫܬ ܒܝܪܚܐ ܕܚܡܫܐ. ܗܕܐ ܗܝ ܫܢܬܐ ܫܒܝܥܝܬܐ ܕܡܠܟܐ ܀ ܟܕ ܢܦܩܘ ܗܟܝܠ ܡܢ ܒܒܝܠ ܒܢܘܡܢܝܐ ܕܝܪܚܐ ܩܕܡܝܐ. ܒܢܘܡܢܝܐ ܕܝܪܚܐ ܕܚܡܫܐ ܐܬܘ ܠܐܘܪܝܫܠܡ. ܐܝܟ ܡܨܠܚܢܘܬܐ ܕܐܬܝܗܒܬ ܠܗܘܢ ܡܢ ܡܪܝܐ ܥܠܘܗܝ ܀
8:7 ܗܘ ܓܝܪ ܥܒܫܪܫ ܝܕܥܬܐ ܣܓܝܐܬܐ ܐܚܝܕ ܗܘܐ ܠܗܝ ܕܠܐ ܡܕܡ ܢܒܨܪ ܡܢ ܗܠܝܢ ܕܒܢܡܘܣܐ ܕܡܪܝܐ ܘܡܢ ܦܘܩ̈ܕܢܐ ܐܟܚܕܐ ܠܡܠܦܘ ܠܟܠܗ ܐܝܣܪܝܠ ܙܕܩ̈ܐ ܘܕܝ̈ܢܐ
8:8 ܐܬܐ ܕܝܢ ܦܘܩܕܢܐ ܗܘ ܕܐܬܟܬܒ ܡܢ ܐܪܛܚܫܫܬ ܡܠܟܐ ܠܘܬ ܥܙܪܐ ܟܗܢܐ ܘܩܪܘܝܐ ܕܢܡܘܣܐ ܕܡܪܝܐ ܕܗ̇ܘ ܕܐܝܬܘܗܝ ܨܚܚܐ ܗܢܐ ܕܣܝܡ
8:9 ܡܠܟܐ ܐܪܛܚܫܫܬ ܠܥܙܪܐ ܗܘ ܟܗܢܐ ܘܩܪܘܝܐ ܕܢܡܘܣܗ ܕܡܪܝܐ ܠܡܚܕܐ
8:10 ܘܗܠܝܢ ܪ̈ܚܡܬ ܐܢܫ̈ܐ ܐܢܐ ܟܕ ܕܢܬ ܦܩܕܬ ܠܗܢܘܢ ܕܒܥܝܢ ܡܢ ܥܡܐ ܕܝܘ̈ܕܝܐ ܗܢܘܢ ܕܪܚܡܝܢ ܘܡܢ ܟܗ̈ܢܐ ܘܡܢ ܠܘ̈ܝܐ ܕܐܝܬܝܗܘܢ ܕܝܢ ܒܡܠܟܘܬܐ ܕܝܠܢ ܠܡܐܙܠ ܥܡܟ ܠܐܘܪܝܫܠܡ
8:11 ܟܠ ܐܝܠܝܢ ܗܟܝܠ ܕܡܬܚܫܒܝܢ ܢܫܩܠܘܢ ܐܝܟܢܐ ܕܫܦܪܬ ܘܠܝ ܘܠܫܒܥܐ ܪ̈ܚܡܐ ܘܡܠܘ̈ܟܐ
8:12 ܐܝܟܢܐ ܕܢܣܥܪܘܢ ܠܗܠܝܢ ܕܥܠ ܝܗܘܕ ܘܥܠ ܐܘܪܝܫܠܡ ܢܩܦܐܝܬ ܠܗܢܝܢ ܕܐܝܬ ܒܢܡܘܣܐ ܕܡܪܝܐ
8:13 ܘܠܡܘܒܠܘ ܩܘܪ̈ܒܢܐ ܠܡܪܝܐ ܗܠܝܢ ܕܢܕܪܬ ܘܐܢܐ ܘܪ̈ܚܡܐ ܠܐܘܪܝܫܠܡ ܘܟܠ ܕܗܒܐ ܘܣܐܡܐ ܗܘ ܕܐܢ ܢܫܬܟܚ ܒܐܬܪܐ ܕܒܒܝܠ ܠܡܪܝܐ ܒܐܘܪܝܫܠܡ ܥܡ ܗܘ ܕܐܬܩܪܒ ܡܢ ܥܡܐ ܠܗܝܟܠܐ ܕܡܪܝܐ ܕܝܠܗܘܢ ܗܘ ܕܒܐܘܪܝܫܠܡ
8:14 ܠܡܬܟܢܫܘ ܕܗܒܐ ܘܣܐܡܐ ܠܬܘܪ̈ܐ ܘܠܕܟܪ̈ܐ ܘܠܐܡܪ̈ܐ ܘܠܗܢܝܢ ܕܠܗܠܝܢ ܢܩ̈ܦܢ
8:15 ܐܝܟ ܕܠܡܩܪܒܘ ܕܒ̈ܚܐ ܥܠ ܡܕܒܚܐ ܕܡܪܝܐ ܕܝܠܗܘܢ ܗܘ ܕܒܐܘܪܝܫܠܡ
8:16 ܘܟܠܗܝܢ ܗܠܝܢ ܕܐܢ ܬܒܥܐ ܥܡ ܐܚ̈ܐ ܕܝܠܟ ܠܡܥܒܕ ܒܕܗܒܐ ܘܒܣܐܡܐ ܫܡܠܐ ܐܝܟ ܨܒܝܢܐ ܕܐܠܗܐ ܕܝܠܟ
8:17 ܘܠܡ̈ܐܢܐ ܟܗ̈ܢܝܐ ܕܡܪܝܐ ܗܠܝܢ ܕܡܬܝܗܒܝܢ ܠܚܫܚܬܐ ܕܗܝܟܠܐ ܕܐܠܗܐ ܕܝܠܟ ܗܘ ܕܒܐܘܪܝܫܠܡ ܘܗܠܝܢ ܕܫܪܟܐ ܕܐܢ ܗܘ ܕܢ̈ܦܠܢ ܠܟ ܠܚܫܚܬܐ ܕܗܝܟܠܐ ܕܐܠܗܐ ܕܝܠܟ
8:18 ܬܬܠ ܡܢ ܒܝܬ ܓܙܐ ܕܡܠܟܐ
8:19 ܐܦ ܐܢܐ ܕܝܢ ܐܪܛܚܫܫܬ ܡܠܟܐ ܦܩܕܬ ܠܢܛܪ̈ܝ ܒܝܬ ܓܙܐ ܕܣܘܪܝܐ ܘܕܦܘܢܝܩܐ ܐܝܟܢܐ ܕܟܠ ܡܐ ܕܐܢ ܢܫܠܘܚ ܥܙܪܐ ܗܘ ܟܗܢܐ ܘܩܪܘܝܐ ܕܢܡܘܣܐ ܕܐܠܗܐ ܗܘ ܡܪܝܡܐ ܝܨܝܦܐܝܬ ܢܬܠܘܢ ܠܗ ܥܕܡܐ ܠܟܟܪ̈ܐ ܡܐܐ ܕܟܣܦܐ
8:20 ܒܗ ܒܕܡܘܬܐ ܕܝܢ ܘܥܕܡܐ ܠܟܘܪ̈ܐ ܡܐܐ ܕܚ̈ܛܐ ܘܕܚܡܪܐ ܟܝ̈ܠܐ ܡܐܐ ܘܐܚܪ̈ܢܝܬܐ
8:21 ܐܝܟ ܢܡܘܣܐ ܕܐܠܗܐ ܢܫܬܡ̈ܠܝܢ ܠܐܠܗܐ ܗܘ ܡܪܝܡܐ ܡܛܠ ܕܠܐ ܢܗܘܐ ܪܘܓܙܐ ܥܠ ܡܠܟܘܬܐ ܕܡܠܟܐ ܘܕܒܢܝ̈ܐ ܕܝܠܗ
8:22 ܘܠܟܘܢ ܕܝܢ ܡܬܐܡܪܐ ܐܝܟܢܐ ܕܠܟܠܗܘܢ ܟܗ̈ܢܐ ܘܠܘܝ̈ܐ ܘܡܙܡܪ̈ܢܐ ܕܟܗ̈ܢܝܬܐ ܘܬܪ̈ܥܐ ܥܒ̈ܕܝ ܟܗ̈ܢܐ ܘܣܦܪ̈ܐ ܕܗܝܟܠܐ ܗܢܐ ܐܦܠܐ ܚܕܐ ܡܕܐܬܐ ܐܦܠܐ ܐܚܪܬܐ ܐܦܝܒܘܠܐ ܘܠܐ ܠܐܢܫ ܢܗܘܐ ܐܝܬ ܫܘܠܛܢܐ ܠܡܪܡܝܘ ܥܠ ܗܢܘܢ
8:23 ܘܐܢܬ ܥܙܪܐ ܐܝܟ ܚܟܡܬܐ ܕܐܠܗܐ ܚܘܐ ܕܝܢ̈ܐ ܘܬܒܘ̈ܥܐ ܐܝܟܢܐ ܕܢܗܘܘܢ ܕܝܢܝܢ ܒܟܠܗ ܣܘܪܝܐ ܘܦܘܢܝܩܐ ܠܟܠܗܘܢ ܗܢܘܢ ܕܐܢ ܢܥܒܪܘܢ ܠܢܡܘܣܗ ܕܐܠܗܐ ܕܝܠܟ ܕܠܗ̇ܢܘܢ ܕܝܢ ܕܠܐ ܝܕܥܝܢ ܬܠܦ
8:24 ܘܟܠܗܘܢ ܗܢܘܢ ܕܐܢ ܢܥܒܪܘܢ ܠܢܡܘܣܗ ܕܐܠܗܐ ܕܝܠܟ ܘܠܡܠܟܝܐ ܒܛܝܠܐܝܬ ܢܫܬܢܩܘܢ ܘܐܢ ܒܡܘܬܐ ܘܐܢ ܐܦ ܒܡܣܡ ܒܪܝܫܐ ܐܘ ܒܚܘܣܪܢܐ ܕܟܣܦܐ ܐܘ ܒܡܬܬܘܒܠܢܘܬܐ
8:25 ܘܐܡܪ ܥܙܪܐ ܣܦܪܐ ܡܒܪܟܐ ܗܘ ܡܪܝܐ ܒܠܚܘܕܘܗܝ ܗܘ ܕܝܗܒ ܗܠܝܢ ܒܠܒܗ ܕܡܠܟܐ ܠܡܫܒܚܘ ܠܒܝܬܐ ܕܝܠܗ ܗܘ ܕܒܐܘܪܝܫܠܡ
8:26 ܘܠܝ ܝܩܪ ܩܕܡܘܗܘܝ ܕܡܠܟܐ ܘܕܗܢܘܢ ܕܥܡܗ ܡܡܠܟܝܢ ܘܕܟܠܗܘܢ ܪ̈ܚܡܐ ܘܪ̈ܘܪܒܢܐ ܕܝܠܗ
8:27 ܘܐܢܐ ܫܦܝܪ ܠܒܝܒܐ ܗܘܝܬ ܐܝܟ ܡܥܕܪܢܘܬܐ ܕܡܪܝܐ ܐܠܗܐ ܕܝܠܝ ܘܟܢܫܬ ܡܢ ܐܝܣܪܝܠ ܓܒܪ̈ܐ ܐܝܟܢܐ ܕܢܣܩܘܢ ܥܡܝ
8:28 ܘܗܠܝܢ ܪ̈ܝܫܢܐ ܩ̈ܕܡܝܐ ܐܝܟ ܫܪ̈ܒܬܐ ܕܝܠܗܘܢ ܘܕܪ̈ܝܫܝ ܦ̈ܠܓܘܬܐ ܗܢܘܢ ܕܣܠܩܝܢ ܗܘܘ ܥܡܝ ܡܢ ܒܒܝܠ ܒܡܠܟܘܬܗ ܕܐܪܛܚܫܫܬ ܡܠܟܐ
8:29 ܡܢ ܒܢܝ̈ܐ ܕܦܪܘܨ ܛܐܪܘܫ. ܗܘ ܕܛܐܡܘܫ ܀ ܡܢ ܒܢܝ̈ܐ ܕܥܛܪܘܬ. ܓܡܠܘܣܝ. ܡܢ ܒ̈ܢܝܐ ܕܕܘܝܕ.
8:30 ܦܪܨ ܙܟܪܝܐ ܘܥܡܗ ܡܢ ܟܬܒܐ ܓܒܪ̈ܐ ܡܐܐ ܘܚܡܫܝܢ
8:31 ܡܢ ܒ̈ܢܝܐ ܕܡܐܬ ܡܘܐܒ ܘܐܠܚܢܢ ܒܪܗ ܕܙܪܚ ܘܥܡܗ ܓܒܪ̈ܐ ܡܐܬܝܢ
8:32 ܡܢ ܒ̈ܢܝܐ ܕܙܝܬܘܥ ܝܘܟܢܝܐ ܕܥܬܝܠܘ ܘܥܡܗ ܓܒܪ̈ܐ ܡܐܬܝܢ ܡܢ ܒ̈ܢܝܐ ܕܥܕܝܢܘܒܝܢ ܢܘܢܬܢ ܘܥܡܗ ܓܒܪ̈ܐ ܡܐܬܝܢ ܘܚܡ̈ܫܝܢ
8:33 ܡܢ ܒܢܝ̈ܐ ܕܠܡܥܣܝܐ ܥܬܠܝܐ ܘܥܡܗ ܓܒܪ̈ܐ ܡܐܬܝܢ ܘܫܒ̈ܥܝܢ
8:34 ܘܡܢ ܒܢܝ̈ܐ ܕܫܦܛܝܐ ܙܪܢܥ ܕܡܝܟܐܝܠ ܘܥܡܗ ܓܒܪ̈ܐ ܫܒ̈ܥܝܢ
8:35 ܡܢ ܒ̈ܢܝܐ ܕܝܘܐܒ ܥܘܒܕܝܐ ܒܪܗ ܕܚܙܩܝܐܝܠ ܘܥܡܗ ܓܒܪ̈ܐ ܡܐܬܝܢ ܘܬܪ̈ܥܣܪ
8:36 ܡܢ ܓܒܪ̈ܐ ܕܢܟܙܝܥ ܫܠܝܡܘܬ ܕܝܘܫܦܝܐ ܘܥܡܗ ܓܒܪ̈ܐ ܡ̈ܐܐ ܘܫ̈ܬܝܢ
8:37 ܡܢ ܒܢܝ̈ܐ ܕܒܚܝܪ ܙܟܪܝܐ ܕܒܝܒܠ ܘܥܡܗ ܓܒܪ̈ܐ ܥܣܪ̈ܝܢ ܘܬܡܢܝܐ
8:38 ܡܢ ܒܢܝ̈ܐ ܕܐܫܕܘܬ ܝܘܚܢܢ ܒܪܗ ܕܐܩܛܐ ܘܥܡܗ ܓܒܪ̈ܐ ܡܐܐ ܘܥܣܪ̈ܐ
8:39 ܡܢ ܒܢܝ̈ܐ ܕܐܕܘܢܝܩܡ ܗܢܘܢ ܐܚܪ̈ܝܐ ܘܗܠܝܢ ܫܡ̈ܗܐ ܕܝܠܗܘܢ ܐܠܝܦܕܠ ܗܘ ܕܓܠܘܠ ܘܫܡܥܝܐ ܘܥܡܗܘܢ ܓܒܪ̈ܐ ܫܒ̈ܥܝܢ
8:40 ܘܡܢ ܒܢܝ̈ܐ ܕܒܢܝܐ ܗܘ ܕܒܥܩܪܘܢ ܘܥܡܗ ܓܒܪ̈ܐ ܫܒ̈ܥܝܢ
8:41 ܘܟܢܫܬ ܐܢܘܢ ܥܠ ܗܘ ܕܡܬܐܡܪ ܬܐܪܐܢ ܢܗܪܐ ܘܫܪܝܢܢ ܬܡܢ ܝܘ̈ܡܐ ܬ̈ܠܬܐ ܘܐܬܒܩܝܬ ܒܗܘܢ
8:42 ܘܡܢ ܟܗ̈ܢܐ ܘܡܢ ܠܘ̈ܝܐ ܠܐ ܐܫܟܚܬ ܬܡܢ
8:43 ܘܫܕܪܬ ܠܘܬ ܐܠܝܥܙܪ ܘܟܕ ܐܬܐ ܐܓܘܢ ܘܡܥܣܡܢ ܣܠܛܢ ܘܫܡܥܝܐ ܘܢܘܪܝܒܢ ܢܬܢܢ ܛܐܢܛܢ ܙܟܪܝܐ ܘܡܘܫܝܐ ܠܒܝܬ ܪ̈ܝܫܢܐ ܘܝܕܘ̈ܥܬܢܐ
8:44 ܘܐܡܪܬ ܠܗܘܢ ܠܡܐܬܐ ܠܘܬ ܠܥܕܢ ܪܝܫܢܐ ܗܘ ܕܒܕܘܟܬܐ ܕܢܛܪ ܒܝܬܓܙܐ
8:45 ܟܕ ܦܩܕܬ ܐܢܘܢ ܠܡܡܠܠܘ ܠܠܥܕܢ ܘܠܐܚ̈ܐ ܕܝܠܗ ܘܠܗܢܘܢ ܕܒܕܘܟܬܐ ܕܢܛܪ ܒܝܬܓܙܐ ܠܡܫܕܪܘ ܠܢ ܠܗܢܘܢ ܕܡܟܗܢܝܢ ܒܒܝܬܗ ܕܡܪܝܐ ܕܝܠܢ
8:46 ܘܐܝܬܝ ܠܢ ܐܝܟ ܐܝ̣ܕܐ ܐܚܝܕܬܐ ܕܡܪܝܐ ܐܠܗܐ ܕܝܠܢ ܓܒܪ̈ܐ ܝܕܘ̈ܥܬܢܐ ܡܢ ܒܢܝ̈ܐ ܕܡܚܠܝ ܗ̇ܘ ܕܠܘܝܐ ܕܝܣܪܝܠ ܠܫܒܟܝܐ ܘܠܒ̈ܢܝܐ ܘܠܐܚ̈ܐ ܕܝܠܗ ܕܐܝܬܝܗܘܢ ܬܡܢܬܥܣܪ̈ܐ
8:47 ܘܠܚܫܒܝܐ ܘܠܚܢܘܢܐ ܘܥܐܛܢ ܡܢ ܐܚ̈ܐ ܕܒܢܝܐ ܕܟܢܥܢܝܐ ܘܒܢܝ̈ܐ ܕܝܠܗܘܢ ܓܒܪ̈ܐ ܥܣܪ̈ܝܢ
8:48 ܘܡܢ ܥܒ̈ܕܝ ܟܗ̈ܢܐ ܗ̇ܢܘܢ ܕܝܗܒ ܗܘܐ ܕܘܝܕ ܘܪ̈ܝܫܢܐ ܠܦܘܠܚܢܐ ܕܠܘ̈ܝܐ ܥܒ̈ܕܝ ܟܗ̈ܢܐ ܡ̈ܬܝܢ ܘܥܣܪ̈ܝܢ ܕܟܠܗܘܢ ܐܫܬܘܕܥܬ ܟܬܝܒܘܬ ܫܡ̈ܗܐ
8:49 ܘܢ̇ܕܪܬ ܬܡܢ ܨܘܡܐ ܠܝܘܢܣ̈ܩܐ ܩܕܡ ܡܪܝܐ ܐܠܗܐ ܕܝܠܢ
8:50 ܠܡܒܥܐ ܡܢܗ ܡܨܠܚܢܘܬܐ ܘܠܢ ܘܠܗ̇ܢܘܢ ܕܐܝܬ ܗܘܐ ܥܡܢ ܒܢܝ̈ܐ ܘܒܥܝܪ̈ܐ
8:51 ܐܬ̇ܟܚܕܬ ܓܝܪ ܠܡܫܐܠ ܡܢ ܡܠܟܐ ܦܪ̈ܫܐ ܘܪ̈ܓܠܝܐ ܠܠܘܝܬܐ ܡܛܠ ܙܗܝܪܘܬܐ ܗ̇ܝ ܕܠܘܬ ܗ̇ܢܘܢ ܕܗܘ̇ܝܢ ܕܠܩܘܒܠܐ ܠܢ
8:52 ܐܡ̣ܪܢܢ ܓܝܪ ܠܡܠܟܐ. ܕܚܝܠܐ ܕܡܪܝܐ ܐܠܗܐ ܕܝܠܢ܉ ܗܘ̇ܐ ܥܡ ܗ̇ܢܘܢ ܕܒ̇ܥܝܢ ܠܗ̣. ܒܟܠ ܬܘܪܨܐ
8:53 ܘܟܠܗ̈ܝܢ ܬܢܝܢ ܐܬܟܫܦܢܢ ܩܕܡ ܡܪܝܐ ܐܠܗܐ ܕܝܠܢ ܘܐܫܬ̣ܘܝܠܢ ܠܚܘܣܝܐ
8:54 ܘܦ̇ܪܫܬ ܡܢ ܪ̈ܝܫܝ ܫܪ̈ܒܬܐ ܕܟܗ̈ܢܐ ܓܒܪ̈ܐ ܬܪ̈ܥܣܪ ܡܫܒ̈ܚܐ ܘܠܫܡܥܝܐ ܘܥܡܗܘܢ ܡܢ ܐܚ̈ܐ ܕܝܠܗܘܢ ܓܒܪ̈ܐ ܥܣܪ̈ܐ
8:55 ܘܬܩܠܬ ܠܗܘܢ ܠܣܐܡܐ ܘܠܕܗܒܐ ܘܠܡ̈ܐܢܐ ܟܗ̈ܢܝܐ ܠܒܝܬܗ ܕܡܪܝܐ ܕܝܠܢ ܗܟܢܐ ܫ̇ܟ̣ܢ ܡܠܟܐ ܘܡܠܘ̈ܟܐ ܕܝܠܗ ܘܪ̈ܘܪܒܢܐ ܘܟܠܗ ܐܝܣܪܝܠ
8:56 ܘܐܫܠܡܬ ܠܗܘܢ ܟܕ ܬܩ̇ܠܬ. ܟܟܪ̈ܐ ܕܣܐܡܐ ܡܐ̈ܐ ܘܫܬܡܐܐ ܘܚܡ̈ܫܝܢ. ܘܡ̈ܐܢܐ ܕܣܐܡܐ ܟܟܪܐ ܡܐܐ. ܘܕܕܗܒܐ ܟܟܪ̈ܐ ܡܐ̈ܐ. ܘܡ̈ܐܢܝ ܕܗܒܐ ܥܣܪ̈ܝܢ. ܘܡ̈ܐܢܐ ܕܢܚܫܐ. ܡܢ ܢܚܫܐ ܛ̇ܒܐ ܡܙܗܪܐ ܡ̈ܐܢܐ ܬܪ̈ܥܣܪ
8:57 ܘܐ̇ܡܪܬ ܠܗܘܢ ܐܦ ܐܢܬܘܢ ܩܕ̈ܝܫܐ ܐܝܬܝܟܘܢ ܠܡܪܝܐ ܘܡ̈ܐܢܐ ܩܕ̈ܝܫܐ ܘܕܗܒܐ ܘܣܐܡܐ ܢܕܪܐ ܠܡܪܝܐ ܐܠܗܐ ܕܐܒܗ̈ܐ ܕܝܠܟܘܢ
8:58 ܫܗܪܘ ܘܛܪ̣ܘ ܥܕܡܐ ܕܡܫܠܡܝܢ ܐܢܬܘܢ ܠܗܘܢ ܫܪ̈ܒܬܐ ܕܟܗ̈ܢܐ ܘ̈ܕܠܘܝܐ ܘܠܪ̈ܝܫܢܐ ܕܫܪܒܬܐ ܕܐܝܣܪܝܠ ܒܐܘܪܝܫܠܡ ܒܒܝܬܓܙܐ ܕܒܝܬܗ ܕܡܪܝܐ ܕܝܠܢ
8:59 ܘܗ̇ܢܘܢ ܕܩܒܠܘ ܟܗ̈ܢܐ ܘܠܘܝ̈ܐ ܠܣܐܡܐ ܘܠܕܗܒܐ ܘܠܡ̈ܐܢܐ ܗܠܝܢ ܕܒܐܘܪܝܫܠܡ ܐܥ̣ܠܘ ܠܗܝܟܠܗ ܕܡܪܝܐ
8:60 ܘܟܕ ܐܫܩܠܢܢ ܡܢ ܢܗܪܐ ܬܐܪܬܐ ܒܬܪܥܣܪ̈ܐ ܕܝܪܚܐ ܩܕܡܝܐ. ܐܬܝܢܢ ܠܐܘܪܝܫܠܡ ܐܝܟ ܐܝܕܐ ܐܚܝܕܬܐ ܕܡܪܝܐ ܐܠܗܐ ܕܝܠܢ. ܗ̇ܝ ܕܥܠܝܢ. ܘܦ̣ܨܝܬ̇ ܠܢ ܡܢ ܡܥܠܬܐ ܕܡܢ ܟܠ ܒܥܠܕܒܒܐ. ܘܐܬܝܢܢ ܠܐܘܪܝܫܠܡ
8:61 ܘܟܕ ܗܘ̣ܐ ܠܢ ܬܡܢ ܝܘܡܐ ܬܠܝܬܝܐ ܒܝܘܡܐ ܪܒܝܥܝܐ ܟܕ ܐܬܬܩܠ ܣܐܡܐ ܘܕܗܒܐ ܐܬܬܫܠܡ ܒܒܝܬܗ ܕܡܪܝܐ ܐܠܗܐ ܕܝܠܢ ܠܐܢܪܡܘܬ ܒܪܗ ܕܐܘܪܝܐ ܟܗܢܐ
8:62 ܘܥܡܗ ܐܠܝܥܙܪ ܗܘ ܕܦܝܢܚܣ ܘܐܝܬ ܗܘܘ ܥܡܗܘܢ ܝܘܒܕ ܝܫܘܥ ܒܪ ܡܚܘܕ ܕܐܒܢܘ ܠܘܝܐ ܐܝܟ ܡܢܝܢܐ ܘܡܬܩܠܐ ܟܠ ܡܕܡ ܟܠܗ ܡܬܩܠܐ ܒܗ ܒܫܥܬܐ
8:63 ܗ̇ܢܘܢ ܕܝܢ ܕܐܬ̣ܘ ܡܢ ܫܒܝ̣ܬܐ ܩܪܒܘ ܕܒ̈ܚܐ ܠܐܠܗܐ ܕܐܝܣܪܝܠ. ܐܡܪ̈ܐ ܬܫ̈ܥܝܢ ܘܐܫ̈ܬܐ. ܬ̈ܝܫܐ ܡܐ̈ܬܝܢ ܘܫ̈ܒܥܝܢ ܘܐܫ̈ܬܐ. ܘܕܚܠܦ ܦܘܪܩܢܐ. ܥ̈ܓܠܐ ܬܪ̈ܥܣܪ. ܟܠܗܘܢ ܕܒ̈ܚܐ ܠܡܪܝܐ ܀
8:64 ܘܝܗܒܘ ܠܦܘܩ̈ܕܢܐ ܕܡܠܟܐ ܠܐܘܩ̈ܢܡܐ ܡ̈ܠܟܝܐ ܘܠܗܘܦܪ̈ܟܐ ܕܣܘܪܝܐ ܥܡܝܩܬܐ ܘܕܦܘܢܝܩܐ ܘܫܒܚܘ ܠܥܡܐ ܘܠܗܝܟܠܗ ܕܡܪܝܐ
8:65 ܘܟܕ ܗܠܝܢ ܐܫܬܡ̈ܠܝܝܢ ܩܪܒܘ ܠܝ ܪ̈ܝܫܢܐ ܟܕ ܐܡܪܝܢ
8:66 ܠܐ ܦܪܫܘ ܥܡܐ ܕܐܝܣܪܝܠ ܘܪ̈ܝܫܢܐ ܘܟܗ̈ܢܐ ܘܠܘ̈ܝܐ ܘܐܚܪ̈ܢܝܝ ܓܢܣܐ ܥܡ̈ܡܐ ܕܐܪܥܐ ܠܛܡܘܐ̈ܬܐ ܕܝܠܗܘܢ ܕܟ̈ܢܥܢܝܐ ܘܕܚܝ̈ܬܝܐ ܘܕܦܪ̈ܙܝܐ ܘܕܝܒܘ̈ܣܝܐ ܘܕܡܘܐܒܝ̈ܐ ܘܕܡܨܪ̈ܝܐ
8:67 ܥܡܪܘ ܗܘܘ ܓܝܪ ܥܡ ܒ̈ܢܬܐ ܕܝܠܗܘܢ ܘܗ̇ܢܘܢ ܘܒ̈ܢܝܐ ܕܝܠܗܘܢ ܘܐܬܚ̇ܠ̣ܛ ܙܪܥ̇ܐ ܗܘ ܩܕܝܫܐ ܒܐܚܪ̈ܢܝܝ ܓܢܣܐ̣ ܥܡ̈ܡܐ ܕܐܪܥܐ ܘܡܫܘܬܦܝܢ ܗܘܘ ܪ̈ܝܫܢܐ ܩܕܡܝ̈ܐ ܘܪ̈ܘܪܒܢܐ ܒܠܐ ܢܡܘܣܝܘܬܐ ܗܕܐ ܡܢ ܫܘܪܝܗ ܕܣܘܥܪܢܐ
8:68 ܘܡܚܕܐ ܕܫܡ̇ܥܬ ܗܠܝܢ ܨ̇ܪܝܬ ܠܢܚ̈ܬܐ ܕܝܠܝ ܘܠܠܒܘܫܐ ܟܗܢܝܐ ܘܡܢܬܫ ܗܘܝܬ ܡܢ ܣܥܪܐ ܕܪܝܫܐ ܕܝܠܝ ܘܕܕܩܢܐ ܕܝܠܝ ܘܝܬ̇ܒܐ ܡܬܘܝܐ ܘܡܥܩܐ
8:69 ܘܐܬܟܢܫܘ ܠܘܬܝ ܟܠܗܘܢ ܗ̇ܢܘܢ ܕܒܙܒܢ ܡܬܬܙܝܥܝܢ ܗܘܘ ܥܠ ܡܠܬܗ ܕܡܪܝܐ ܐܠܗܐ ܕܐܝܣܪܝܠ ܟܕ ܐܢ̇ܐ ܡܬܐܒܠ ܗܘܝܬ ܥܠܝܗ̇ ܕܠܐ ܢܡܘܣܝܘܬܐ ܘܝܬܝܒ ܗܘܝܬ ܡ̇ܥܩܐ ܥܕܡܐ ܠܕܒܚܬܐ ܦܢܝܝܬܐ
8:70 ܘܟܕ ܩ̇ܡܬ ܡܢ ܨܘܡܐ ܘܡܣܕܩܐ ܐܝܬ ܗܘܐ ܠܝ ܠܢܚ̈ܬܐ ܘܠܠܒܘܫܐ ܟܗܢܝܐ ܟ̇ܦܬ ܠܒܘܪ̈ܟܐ ܘܦܫܛܬ ܠܐܝ̈ܕܝܐ ܠܘܬ ܡܪܝܐ ܐܡ̇ܪ ܗ̇ܘܝܬ
8:71 ܡܪܝܐ ܒ̇ܗ̣ܝܬ ܐܢ̣ܐ ܘܡܟܚܕ ܐܢ̣ܐ ܩܕܡ ܦܪܨܘܦܐ ܕܝܠܟ
8:72 ܚܛܗ̈ܐ ܓܝܪ ܕܝܠܢ ܣܓ̣ܝܘ ܡܢ ܣܥܪܐ ܕܪ̈ܝܫܐ ܕܝܠܢ ܠܐ ܝ̣ܕܝ̈ܥܬܐ ܕܝܠܢ ܥܒܪ̈ܝܢ ܥܕܡܐ ܠܫܡܝܐ
8:73 ܬܘܒ ܡܢ ܙܒ̈ܢܐ ܕܐܒ̈ܗܐ ܕܝܠܢ ܘܐܝ̇ܬܝܢ ܒܚܛܝܬܐ ܪܒܬܐ ܥܕܡܐ ܠܝܘܡܐ ܗܢܐ
8:74 ܘܡܛܠ ܚܛܗ̈ܐ ܕܝܠܢ ܘܕܐܒ̈ܗܝܢ ܐܬܬܫܠܡܢܢ ܥܡ ܐ̈ܚܝܢ ܘܥܡ ܡ̈ܠܟܐ ܕܝܠܢ ܘܥܡ ܟܗ̈ܢܐ ܕܝܠܢ ܠܡ̈ܠܟܐ ܕܝܠܢ ܠܣܝܦܐ ܘܠܫܒܝ̣ܬܐ ܘܠܒܙܬܐ ܥܡ ܒܗܬܬܐ ܥܕܡܐ ܠܝܘܡܐ ܕܝܘܡܢܐ
8:75 ܘܗܫܐ ܢܘܚ ܡܛܠ ܕܩܠܝܠ ܡܕܡ ܗܘܘ ܠܢ ܪܚ̈ܡܐ ܡܢܟ ܡܪܝܐ ܠܡܫܬܒܩܘ ܠܢ ܥܩ̣ܪܐ. ܘܫܡܐ ܒܕܘܟܬܐ ܕܡܩܕܫܐ ܕܝܠܟ.
8:76 ܠܡܬܓܠܝܘ ܢܗܝܪܐ ܕܝܠܟ ܒܒܝܬܗ ܕܡܪܝܐ ܐܠܗܐ ܕܝܠܢ ܠܡܬܠ ܬܘܪܣܝܐ ܒܙܒ̣̇ܢܐ ܕܥܒ̣ܕܘܬܐ ܕܝܠܢ ܘܟܕ ܦ̇ܠܚܝܢ ܗܘ̣ܝܢ ܥܒ̇ܕܘܬܐ ܠܐ ܐܫܬܒܩܢܢ ܡܢ ܡܪܝܐ
8:77 ܐܠܐ ܥܒ̣ܕ ܠܢ ܒܛܝܒܘܬܐ ܩܕܡ ܡ̈ܠܟܐ ܦܪ̈ܣܝܐ ܠܡܬܠ ܠܢ ܬܘܪܣܝܐ
8:78 ܘܠܡܫܒܚܘ ܠܗܝܟܠܗ ܕܡܪܝܐ ܕܝܠܢ ܘܠܡܩܡܘ ܠܨܗܝܘܢ ܚܪܒܬܐ ܠܡܬܠ ܠܢ ܡܫܪܪܘܬܐ ܒܝܗܘܕ ܘܒܐܘܪܝܫܠܡ
8:79 ܘܗܫܐ ܡܢܐ ܢܐ̇ܡܪ ܡܪܝܐ ܟܕ ܐܝܬ ܠܢ ܗܠܝܢ ܥܒ̣ܪܢܢ ܠܦܘܩ̈ܕܢܐ ܕܝܠܟ ܗܠܝܢ ܕܝܗܒܬ ܒܐܝ̣ܕܐ ܕܥ̈ܒ̣ܕܐ ܕܝܠܟ ܢܒ̈ܝܐ ܟܕ ܐܡܪ ܐܢܬ
8:80 ܕܐܪܥܐ ܠܗ̇ܝ ܕܥܐܠܝܢ ܐܢܬܘܢ ܠܡܐܪܬܗ̇ ܐܝܬܝܗ̇ ܐܪܥܐ ܡܣܝܒܬܐ ܒܡܣܝܒܘܬܐ ܕܐܚܪ̈ܢܝܝ ܓܢܣܐ ܕܐܪܥܐ ܘܡܢ ܛܡܘܐܬܐ ܕܝܠܗܘܢ ܡܠܐܘܗ̇ ܛܡܘܐܬܐ
8:81 ܗܫܐ ܠܒ̈ܢܬܐ ܕܝܠܗܘܢ ܠܐ ܬܥܡܪܘܢ ܥܡ ܒܢܝ̈ܐ ܕܝܠܟܘܢ ܘܠܒ̈ܢܬܐ ܕܝܠܟܘܢ ܠܐ ܬܬܠܘܢ ܠܒܢܝ̈ܐ ܕܝܠܗܘܢ
8:82 ܘܠܐ ܬܒܥܘܢ ܫܝܢܐ ܕܠܘܬܗܘܢ ܒܟܠܗ ܙܒ̣̇ܢܐ. ܐܝܟܢܐ ܕܬܬ̣ܡܨܘܢ ܘܬܟܠܘܢ ܠܛܒ̈ܬܗ̇ ܕܐܪܥܐ. ܘܬܘܪܬܘܢ ܠܒܢܝ̈ܐ ܕܝܠܟܘܢ ܥܕܡܐ ܠܥܠܡ ܀
8:83 ܘܗܠܝܢ ܟܠܗܝ̈ܢ ܕܓܕܫ̣ܝ̈ܢ ܠܢ ܗ̣̈ܘܝܢ ܡܛܠ ܥ̇ܒ̈ܕܐ ܕܝܠܢ ܒ̈ܝ̣ܫܐ. ܘܚܛܗ̈ܐ ܕܝܠܢ ܒ̈ܝ̣ܫܐ. ܘܚܛܗ̈ܐ ܗܠܝܢ ܪ̈ܘܪܒܐ. ܐܢܬ ܓܝܪ ܡܪܝܐ. ܐܩ̣ܠܬ ܠܚܛܗ̈ܐ ܕܝܠܢ
8:84 ܘܝܗܒ̣ܬ ܠܢ ܕܐܝܟ ܗܢܐ ܥܩܪܐ ܬܘܒ ܟܕ ܗܦܟܢܢ ܠܡܥ̣ܒܪ ܢܡܘܣܐ ܕܝܠܟ ܠܗ̇ܝ ܕܠܡܬܚܠܛܘ ܒܛܡܘܐܬܐ ܕܥܡ̈ܡܐ ܕܐܪܥܐ
8:85 ܠܐ̣ ܪܓ̣ܙܬ ܥܠܝܢ ܠܡܘܒܕܘ ܠܢ ܥܕܡܐ ܕܠܐ ܢܫܬ̣ܒܩ ܥܩܪܐ ܘܙܪܥܐ ܘܫܡܐ ܕܝܠܢ
8:86 ܡܪܝܐ ܡܪܝܐ̈ ܐܠܗܐ ܕܐܝܣܪܝܠ ܫܪܝܪܐ ܐܝܬܝܟ ܐܫܬ̣ܒܩ ܠܢ ܥܩܪܐ ܒܝܘܡܢܐ
8:87 ܗܐ ܗܫܐ ܐܝܬܝܢ ܩܕܡܝܟ. ܒܠܐ ܢܡܘܣ̈ܝܘܬܐ ܕܝܠܢ. ܠܐ ܓܝܪ ܐܝܬ ܠܡܩܡ ܬܘܒ ܩܕܡܝܟ ܥܡ ܗܠܝܢ ܀
8:88 ܘܟܕ ܡܨܠܐ ܥܙܪܐ ܘܡܘܕܐ ܗܘܐ ܟܕ ܒ̇ܟܐ ܘܢܦܝ̣ܠ ܥܠ ܐܪܥܐ ܩܕܡ ܗܝܟܠܐ. ܐܬܟܢ̣ܫܘ ܥܠܘܗܝ. ܡܢ ܐܘܪܝܫܠܡ. ܥܡܐ ܣܓܝܐܐ ܣܓܝ. ܕܓܒܪ̈ܐ ܘܢܫ̈ܐ. ܘܥܠܝ̈ܡܐ ܘܛܠܝ̈ܐ. ܒܟܝܐ ܓܝܪ ܐܝܬ ܗܘܐ ܪܒܐ. ܣܘܓܐܐ.
8:89 ܘܟܕ ܐܙܥܩ ܝܘܟܢܝܐ ܕܥ̇ܐܠ ܡܢ ܒܢܝ̈ܐ ܕܝܣܪܝܠ ܐܡ̣ܪ ܥܙܪܐ ܚܢܢ ܚܛܝ̣ܢܢ ܒܡܪܝܐ ܘܐܥܡܪܢܢ ܢܫ̈ܐ ܐܚܪ̈ܢܝܬ ܓܢܣܐ ܡܢ ܥܡܐ ܕܐܪܥܐ ܥܡܢ ܘܗܫܐ ܐܝܬ ܗܘ ܣܒܪܐ ܠܐܝܣܪܝܠ
8:90 ܡܛܠ ܗܠܝܢ. ܒܗܕܐ ܬܗ̣ܘܐ ܠܢ ܡܘܡ̈ܬܐ ܠܘܬ ܡܪܝܐ. ܠܡܦܩܘ ܠܟܠܗ̈ܝܢ ܢܫ̈ܐ ܕܝܠܢ܇ ܗܠܝܢ ܕܡܢ ܐܚܪ̈ܢܝܝ ܓܢܣܐ ܥܡ ܒܢܝ̈ܐ ܕܝܠܗܝܢ. ܐܝܟ ܕܐܬ̣ܬܕܝܢܬ̇ ܠܟ ܀ ܘܟܠܗܘܢ ܗ̇ܢܘܢ ܕܡܬܬܦܝܣܝܢ ܠܢܡܘܣܗ ܕܡܪܝܐ
8:91 ܟܕ ܩܡܘ ܐܡܪܘ ܠܘܬ ܥܙܪܐ ܩܘܡ ܫܡܠܐ ܠܘܬܟ ܗܘ ܓܝܪ ܣܘܥܪܢܐ ܘܚܢܢ ܥܡܟ ܟܕ ܡܬܚܝܠ ܐܢܬ ܥܒ̣ܕ
8:92 ܘܟܕ ܩ̣ܡ ܥܙܪܐ ܐܘܡ̣ܝ ܠܪ̈ܝܫܝ ܫܪ̈ܒܬܐ ܕܟܗ̈ܢܐ ܘܕܠܘ̈ܝܐ ܠܟܠܗܘܢ ܒܢܝ̈ܐ ܕܐܝܣܪܝܠ ܠܡܥܒܕ ܐܝܟ ܗܠܝܢ ܘܐܝܡ̣ܝܘ