Skip to content

Sirach · Chapter 48

Text display

Font size: 19px

Go to a reference
Same place in another edition

Anchor: Sir.48.1

Side by side

Tap a number or a passage to select it.

И҆ воста̀ и҆лїа̀ прⷪ҇ро́къ ꙗ҆́кѡ ѻ҆́гнь, и҆ сло́во є҆гѡ̀ ꙗ҆́кѡ свѣща̀ горѧ́ше:
и҆́же нанесѐ на нѧ̀ гла́дъ и҆ ре́вностїю свое́ю ѹ҆ма́ли ѧ҆̀,
сло́вомъ гдⷭ҇нимъ ѹ҆держа̀ не́бо и҆ сведѐ та́кѡ три́жды ѻ҆́гнь съ небесѐ.
Ко́ль просла́вилсѧ є҆сѝ, и҆лїѐ, чꙋдесы̀ твои́ми, и҆ кто̀ подо́бенъ тебѣ̀ похвали́тисѧ;
Воздви́гнꙋвъ мертвеца̀ ѿ сме́рти и҆ и҆з̾ а҆́да сло́вомъ вы́шнѧгѡ,
сведы́й цари̑ въ па́гꙋбꙋ и҆ просла́влєнныѧ ѿ ѻ҆дра̀ и҆́хъ,
слы́шавый въ сїна́и ѡ҆бличе́нїе и҆ въ хѡри́вѣ сꙋдбы̑ ѿмще́нїѧ,
помазꙋ́ѧй цари̑ на воздаѧ́нїе и҆ прⷪ҇ро́ки прее́мники по себѣ̀,
взѧ́выйсѧ ви́хромъ ѻ҆́гненнымъ на колесни́цѣ ко́ней ѻ҆́гненныхъ,
впи́санъ во ѡ҆бличє́нїѧ на времена̀, ѹ҆толи́ти гнѣ́въ пре́жде ꙗ҆́рости и҆ ѡ҆брати́ти се́рдце ѻ҆́тчее къ сы́нꙋ и҆ ѹ҆стро́ити кѡлѣ́на і҆а̑кѡвлѧ.
Блаже́ни ви́дѣвшїи тѧ̀ и҆ любо́вїю ѹ҆кра́шеннїи.
И҆́бо мы̀ житїе́мъ поживе́мъ.
И҆лїа̀, и҆́же ви́хромъ покрове́нъ бы́сть, и҆ є҆лїссе́й и҆спо́лнисѧ дꙋ́ха є҆гѡ̀ и҆ во дни̑ своѧ̑ не поколеба́сѧ ѿ кнѧзе́й, и҆ не премо́же є҆гѡ̀ никто́же:
всѧ́ко сло́во не превзы́де є҆гѡ̀, и҆ во ѹ҆спе́нїи прⷪ҇ро́чествова тѣ́ло є҆гѡ̀:
и҆ въ житїѝ свое́мъ сотворѝ чꙋдеса̀, и҆ во ѹ҆ме́ртвїи ди̑вна дѣла̀ є҆гѡ̀.
Во всѣ́хъ си́хъ не пока́ѧшасѧ лю́дїе и҆ не ѿстꙋпи́ша ѿ грѣ̑хъ свои́хъ, до́ндеже плѣне́ни бы́ша ѿ землѝ своеѧ̀ и҆ расточе́ни бы́ша по все́й землѝ.
И҆ ѡ҆ста́сѧ люді́й ма́лѡ, и҆ кнѧ́зь въ домꙋ̀ даві́довѣ.
Нѣ́цыи ѹ҆́бѡ ѿ ни́хъ сотвори́ша ѹ҆го́дное, нѣ́цыи же ѹ҆мно́жиша грѣхѝ.
Є҆зекі́а ѹ҆твердѝ гра́дъ сво́й и҆ введѐ посредѣ̀ є҆гѡ̀ во́дꙋ: и҆скопа̀ желѣ́зомъ ка́мень и҆ созда̀ и҆сто́чники вода́мъ.
Во дне́хъ є҆гѡ̀ взы́де сеннахирі́мъ и҆ посла̀ раѱа́ка, и҆ воздви́же рꙋ́кꙋ свою̀ на сїѡ́на и҆ возвели́чисѧ горды́нею свое́ю.
Тогда̀ подвиго́шасѧ сердца̀ и҆ рꙋ́цѣ и҆́хъ, и҆ поболѣ́ша ꙗ҆́кѡ ражда́ющыѧ.
И҆ помоли́шасѧ гдⷭ҇ꙋ млⷭ҇тивомꙋ, воздѣ́вше рꙋ́ки своѧ̑ къ немꙋ̀:
и҆ ст҃ы́й съ нб҃сѐ ско́рѡ ѹ҆слы́ша ѧ҆̀ и҆ и҆зба́ви ѧ҆̀ рꙋко́ю и҆са́їиною:
поразѝ полкѝ а҆ссѷрі̑йскїѧ, и҆ сокрꙋшѝ ѧ҆̀ а҆́гг҃лъ є҆гѡ̀.
Сотвори́ бо є҆зекі́а ѹ҆го́дное гдⷭ҇еви и҆ ѹ҆крѣпи́сѧ на пꙋте́хъ даві́да ѻ҆тца̀ своегѡ̀, ꙗ҆̀же заповѣ́да и҆са́їа, прⷪ҇ро́къ ве́лїй и҆ вѣ́ренъ въ видѣ́нїи свое́мъ.
Во дне́хъ є҆гѡ̀ воспѧти́сѧ со́лнце, и҆ приложѝ житїѧ̀ царе́ви:
дꙋ́хомъ ве́лїимъ ви́дѣ послѣ̑днѧѧ и҆ ѹ҆тѣ́ши сѣ́тꙋющыѧ въ сїѡ́нѣ:
да́же до вѣ́ка показа̀ бꙋ̑дꙋщаѧ и҆ сокровє́наѧ, пре́жде не́же прїитѝ и҆̀мъ.

Source and terms: Church Slavonic Bible, Elizabethan redaction (1751/1756) · CC BY-SA 4.0 · Бі́блїа, си́рѣчь кни̑ги сщ҃е́ннагѡ писа́нїѧ ве́тхагѡ и҆ но́вагѡ завѣ́та (Church Slavonic Bible, Elizabethan redaction, Moscow 1751, corrected 1756). Transcription by Wikisource contributors, wikisource.org page 'Бі́блїа' (index revision 936404) and its 76 book pages, each tagged {{PD-old}}. Changes: wiki markup, verse numerals and page templates removed, drop capitals joined to the verse. · terms · source

Bookmarks, notes and the reading position are stored only in this browser.