Skip to content

Matthew · Chapter 22

Text display

Font size: 19px

Go to a reference
Same place in another edition

Anchor: Matt.22.1

Side by side

Tap a number or a passage to select it.

И҆ ѿвѣща́въ і҆и҃съ, па́ки речѐ и҆̀мъ въ при́тчахъ, глаго́лѧ:
Ѹ҆подо́бисѧ црⷭ҇твїе нбⷭ҇ное чл҃вѣ́кꙋ цр҃ю̀, и҆́же сотворѝ бра́ки сн҃ꙋ своемꙋ̀.
И҆ посла̀ рабы̑ своѧ̀, призва́ти зва̑нныѧ на бра́ки: и҆ не хотѧ́хꙋ прїитѝ.
Па́ки посла̀ и҆́ны рабы̑, глаго́лѧ: рцы́те зва̑ннымъ, сѐ ѡ҆бѣ́дъ мо́й ѹ҆гото́вахъ, ю҆нцы̀ моѝ и҆ ѹ҆пита̑ннаѧ и҆сколє́на, и҆ всѧ̀ готѡ́ва: прїиди́те на бра́ки.
Ѻ҆ни́ же небре́гше ѿидо́ша, ѻ҆́въ ѹ҆́бѡ на село̀ своѐ, ѻ҆́въ же на кꙋ̑пли своѧ̀.
Про́чїи же є҆́мше рабы̑ є҆гѡ̀, досади́ша и҆̀мъ, и҆ ѹ҆би́ша и҆̀хъ.
И҆ слы́шавъ ца́рь то́й разгнѣ́васѧ, и҆ посла́въ вѡ́ѧ своѧ̀, и҆ погꙋбѝ ѹ҆бі́йцы ѻ҆́ны, и҆ гра́дъ и҆́хъ зажжѐ.
Тогда̀ глаго́ла рабѡ́мъ свои́мъ: бра́къ ѹ҆́бѡ гото́въ є҆́сть, зва́ннїи же не бы́ша досто́йни.
И҆ди́те ѹ҆́бѡ на и҆схѡ́дища пꙋте́й, и҆ є҆ли́цѣхъ а҆́ще ѡ҆брѧ́щете, призови́те на бра́ки.
И҆ и҆зше́дше рабѝ ѻ҆́ни на распꙋ́тїѧ, собра́ша всѣ́хъ є҆ли́цѣхъ ѡ҆брѣто́ша, ѕлы̑ѧ же и҆ дѡ́брыѧ: и҆ и҆спо́лнисѧ бра́къ возлежа́щихъ.
Вше́дъ же цр҃ь ви́дѣти возлежа́щихъ, ви́дѣ тꙋ̀ человѣ́ка не ѡ҆болче́на во ѡ҆дѣѧ́нїе бра́чное:
И҆ глаго́ла є҆мꙋ̀: дрꙋ́же, ка́кѡ вше́лъ є҆сѝ сѣ́мѡ, не и҆мы́й ѡ҆дѣѧ́нїѧ бра́чна; ѻ҆́нъ же ѹ҆молча̀.
Тогда̀ речѐ цр҃ь слꙋга́мъ: свѧза́вше є҆мꙋ̀ рꙋ́цѣ и҆ но́зѣ, воз̾ми́те є҆го̀, и҆ вве́рзите во тмꙋ̀ кромѣ́шнюю: тꙋ̀ бꙋ́детъ пла́чь и҆ скре́жетъ зꙋбѡ́мъ.
Мно́зи бо сꙋ́ть зва́ни, ма́лѡ же и҆збра́нныхъ.
Тогда̀ ше́дше фарїсе́є, совѣ́тъ прїе́мше, ꙗ҆́кѡ да ѡ҆больстѧ́тъ є҆го̀ сло́вомъ.
И҆ посыла́ютъ къ немꙋ̀ ѹ҆чн҃кѝ своѧ̀ съ и҆рѡдїа́ны, глаго́люще: ѹ҆чи́телю, вѣ́мы, ꙗ҆́кѡ и҆́стиненъ є҆сѝ, и҆ пꙋтѝ бж҃їю вои́стиннꙋ ѹ҆чи́ши, и҆ неради́ши ни ѡ҆ ко́мже: не зри́ши бо на лицѐ чл҃вѣ́кѡмъ.
Рцы̀ ѹ҆́бѡ на́мъ, что́ ти сѧ мни́тъ; досто́йно ли є҆́сть да́ти кинсо́нъ ке́сареви, и҆лѝ нѝ;
Разꙋмѣ́въ же і҆и҃съ лꙋка́вство и҆́хъ, речѐ: что́ мѧ и҆скꙋша́ете лицемѣ́ри;
Покажи́те мѝ злати́цꙋ кинсо́ннꙋю. ѻ҆ни́ же принесо́ша є҆мꙋ̀ пѣ́нѧзь.
И҆ глаго́ла и҆̀мъ: чі́й ѻ҆́бразъ се́й и҆ написа́нїе;
И҆ глаго́лаша є҆мꙋ̀: ке́саревъ. тогда̀ глаго́ла и҆̀мъ: воздади́те ѹ҆́бѡ ке́сарєва ке́сареви, и҆ бж҃їѧ бг҃ови.
И҆ слы́шавше диви́шасѧ: и҆ ѡ҆ста́вльше є҆го̀ ѿидо́ша.
Въ то́й де́нь пристꙋпи́ша къ немꙋ̀ саддꙋке́є, и҆̀же глаго́лютъ не бы́ти воскресе́нїю, и҆ вопроси́ша є҆го̀,
Глаго́люще: ѹ҆чи́телю, мѡѷсе́й речѐ: а҆́ще кто̀ ѹ҆́мретъ не и҆мы́й ча̑дъ, да по́йметъ бра́тъ є҆гѡ̀ женꙋ̀ є҆гѡ̀, и҆ воскреси́тъ сѣ́мѧ бра́та своегѡ̀.
Бѣ́ша же въ на́съ се́дмь бра́тїѧ, и҆ пе́рвый ѡ҆же́ньсѧ ѹ҆́мре: и҆ не и҆мы́й сѣ́мене, ѡ҆ста́ви женꙋ̀ свою̀ бра́тꙋ своемꙋ̀.
Та́кожде же и҆ вторы́й, и҆ тре́тїй, да́же до седма́гѡ.
Послѣди́ же всѣ́хъ ѹ҆́мре и҆ жена̀.
Въ воскреше́нїе ѹ҆́бѡ, кото́рагѡ ѿ седми́хъ бꙋ́детъ жена̀; вси́ бо и҆мѣ́ша ю҆̀.
Ѿвѣща́въ же і҆и҃съ речѐ и҆̀мъ: прельща́етесѧ, не вѣ́дꙋще писа́нїѧ, ни си́лы бж҃їѧ.
Въ воскресе́нїе бо ни же́нѧтсѧ, ни посѧга́ютъ: но ꙗ҆́кѡ а҆́гг҃ли бж҃їи на нб҃сѝ сꙋ́ть.
Ѡ҆ воскресе́нїи же ме́ртвыхъ нѣ́сте ли члѝ рече́ннагѡ ва́мъ бг҃омъ, глаго́лющимъ:
А҆́зъ є҆́смь бг҃ъ а҆враа́мовъ, и҆ бг҃ъ і҆саа́ковъ, и҆ бг҃ъ і҆а́кѡвль, нѣ́сть бг҃ъ, бг҃ъ ме́ртвыхъ, но бг҃ъ живы́хъ;
И҆ слы́шавше наро́ди, дивлѧ́хꙋсѧ ѡ҆ ѹ҆че́нїи є҆гѡ̀.
Фарїсе́є же слы́шавше, ꙗ҆́кѡ посрамѝ саддꙋке́и, собра́шасѧ вкꙋ́пѣ.
И҆ вопросѝ є҆ди́нъ ѿ ни́хъ законоꙋчи́тель, и҆скꙋша́ѧ є҆го̀, и҆ глаго́лѧ:
Ѹ҆чи́телю, ка́ѧ за́повѣдь бо́льши є҆́сть въ зако́нѣ;
І҆и҃съ же речѐ є҆мꙋ̀: возлю́биши гдⷭ҇а бг҃а твоего̀ всѣ́мъ се́рдцемъ твои́мъ, и҆ все́ю дꙋше́ю твое́ю, и҆ все́ю мы́слїю твое́ю.
Сїѧ̀ є҆́сть пе́рваѧ и҆ бо́льшаѧ за́повѣдь.
Втора́ѧ же подо́бна є҆́й: возлю́биши и҆́скреннѧго твоего̀, ꙗ҆́кѡ са́мъ себѐ.
Въ сїю̀ ѻ҆бою̀ за́повѣдїю ве́сь зако́нъ и҆ проро́цы ви́сѧтъ.
Со́бранѡмъ же фарїсе́ѡмъ, вопросѝ и҆̀хъ і҆и҃съ,
Глаго́лѧ: что́ сѧ ва́мъ мни́тъ ѡ҆ хрⷭ҇тѣ̀, чі́й є҆́сть сн҃ъ; глаго́лаша є҆мꙋ̀: дв҃довъ.
Глаго́ла и҆̀мъ: ка́кѡ ѹ҆́бѡ дв҃дъ дх҃омъ гдⷭ҇а є҆го̀ нарица́етъ, глаго́лѧ:
Речѐ гдⷭ҇ь гдⷭ҇еви моемꙋ̀, сѣдѝ ѡ҆деснꙋ́ю менѐ, до́ндеже положꙋ̀ врагѝ твоѧ̀ подно́жїе нога́ма твои́ма.
А҆́ще ѹ҆́бѡ дв҃дъ нарица́етъ є҆го̀ гдⷭ҇а, ка́кѡ сн҃ъ є҆мꙋ̀ є҆́сть;
И҆ никто́же можа́ше ѿвѣща́ти є҆мꙋ̀ словесѐ: нижѐ смѣ́ѧ кто̀ ѿ тогѡ̀ днѐ вопроси́ти є҆го̀ ктомꙋ̀.

Source and terms: Church Slavonic Bible, Elizabethan redaction (1751/1756) · CC BY-SA 4.0 · Бі́блїа, си́рѣчь кни̑ги сщ҃е́ннагѡ писа́нїѧ ве́тхагѡ и҆ но́вагѡ завѣ́та (Church Slavonic Bible, Elizabethan redaction, Moscow 1751, corrected 1756). Transcription by Wikisource contributors, wikisource.org page 'Бі́блїа' (index revision 936404) and its 76 book pages, each tagged {{PD-old}}. Changes: wiki markup, verse numerals and page templates removed, drop capitals joined to the verse. · terms · source

Bookmarks, notes and the reading position are stored only in this browser.