Перейти к содержанию

Niddah · 17b

Вид текста

Размер шрифта: 19px

Перейти к месту
То же место в другом издании

Опорное место: BT.Niddah.17b.1

Нажмите на номер или текст фрагмента, чтобы выбрать его.

Tohorot

אפילו מלא חרדל
מתני׳ משל משלו חכמים באשה החדר והפרוזדור והעלייה
דם החדר טמא דם העלייה טהור נמצא בפרוזדור ספקו טמא לפי שחזקתו מן המקור
גמ׳ רמי בר שמואל ורב יצחק בריה דרב יהודה תנו נדה בי רב הונא אשכחינהו רבה בר רב הונא דיתבי וקאמרי החדר מבפנים והפרוזדור מבחוץ ועלייה בנויה על שתיהן ולול פתוח בין עלייה לפרוזדור
נמצא מן הלול ולפנים ספקו טמא מן הלול ולחוץ ספקו טהור
אתא ואמר ליה לאבוה ספקו טמא אמרת לן מר והא אנן שחזקתו מן המקור תנן
א"ל אנא הכי קאמינא מן הלול ולפנים ודאי טמא מן הלול ולחוץ ספקו טמא
אמר אביי מאי שנא מן הלול ולחוץ דספקו טמא דדלמא שחתה ומחדר אתא מן הלול ולפנים נמי אימא אזדקרה ומעלייה אתא
אלא אמר אביי אי בתר חששא אזלת אידי ואידי ספק הוא ואי בתר חזקה אזלת מן הלול ולפנים ודאי טמא מן הלול ולחוץ ודאי טהור
תני רבי חייא דם הנמצא בפרוזדור חייבין עליו על ביאת מקדש ושורפין עליו את התרומה ורב קטינא אמר אין חייבין עליו על ביאת מקדש ואין שורפין עליו את התרומה
להך לישנא דאמר אביי אי בתר חששא אזלת מסייע ליה לרב קטינא ופליגא דרבי חייא
להך לישנא דאמרת אי בתר חזקה אזלת מסייע ליה לרבי חייא

Источник и условия: Вавилонский Талмуд (37 трактатов), текст виленского издания (he.wikisource) · CC BY-SA 4.0 · Talmud Bavli, Vilna edition, text from Hebrew Wikisource (he.wikisource.org, תלמוד בבלי), via Sefaria-Export (licence field 'CC-BY-SA'). · условия · источник

Закладки, заметки и место чтения хранятся только в этом браузере.