Skip to content

Nedarim · 14b

Text display

Font size: 19px

Go to a reference
Same place in another edition

Anchor: BT.Nedarim.14b.1

Tap a number or a passage to select it.

Nashim

תניא הנודר בתורה לא אמר כלום במה שכתוב בה דבריו קיימין בה ובמה שכתוב בה דבריו קיימין
קתני במה שכתוב בה דבריו קיימין בה ובמה שכתוב בה צריך למימר
אמר רב נחמן לא קשיא הא דמחתא אורייתא אארעא הא דנקיט לה בידיה מחתא על ארעא דעתיה אגווילי נקט לה בידיה דעתיה על האזכרות שבה
ואיבעית אימא דמחתא על ארעא והא קא משמע לן דאף על גב דמחתא על ארעא כיוון דאמר במה שכתוב בה מהני וזו ואין צריך לומר זו קתני
ואי בעית אימא כולה מציעתא נמי דנקיט ליה בידיה והא קא משמע לן כיוון דנקיט ליה בידיה אף על גב דלא אמר אלא בה כמאן דאמר במה שכתוב בה דמי:
מתני׳ קונם שאני ישן שאני מדבר שאני מהלך האומר לאשה קונם שאני משמשך הרי זה בלא יחל דברו:
גמ׳ איתמר קונם עיני בשינה היום אם אישן למחר אמר רב יהודה אמר רב אל יישן היום שמא יישן למחר ורב נחמן אמר יישן היום ולא חיישינן שמא יישן למחר ומודה רב יהודה באומר קונם עיני בשינה למחר אם אישן היום שישן היום

Source and terms: Babylonian Talmud (37 tractates), text of the Vilna edition (Hebrew Wikisource) · CC BY-SA 4.0 · Talmud Bavli, Vilna edition, text from Hebrew Wikisource (he.wikisource.org, תלמוד בבלי), via Sefaria-Export (licence field 'CC-BY-SA'). · terms · source

Bookmarks, notes and the reading position are stored only in this browser.